Hezkuntzak oinarrizko funtzioak betetzen ditu gizabanakoen bizitzan eta gizartean.
Gizabanakoa egon dagoen toki guztiak dira izatez hezkuntza guneak eta, bai formazioa eta bai baloreen lorpena etengabe egiten da, bizitza osoan zehar. Hala ere, eskola heziketak familia-heziketarekin batera izugarrizko garrantzia du haur eta gazteen formazioan horiei oinarrizko identitatea eta errealitatearen ikuskeraren eraikuntza ematen baitie ezagutza eta balorapen etikoa integratuz.
Familiekin koordinatuz, Ikastola da 18 urtez ikasleen formakuntza gunerik garrantzitsuenetako bat.
Larramendi lkastolak, beteak ditu 50 urte, eta hasierako euskal hezkuntzaren konpromezuari leialtasunez eutsiz, moldatu egin da guraso eta hezkuntza-zerbitzuak hartzen dituzten ikasleen itxarobide berri eta eskarietara, baita ere gizartean gertatzen ari diren aldaketa eta berrikuntzetara.
Hezkuntza-Proiektua komunitate osoak ulertzen duen egoera ideala deskribatzen duen agiria izanik, hara orientatuz ikastolako ekintza guztiak, erantzun behar die, alde batetik, eskakizun berriei eta gaur egun dauden aurrerakuntzei eta, bestetik, erakundea bera sortu zeneko arrazoiari.
Herri iniziatibaz, herritik eta herriarentzat, euskara eta euskal kultura sustatzeko asmoz sortutako ekimena da. Euskal Herriko beste ikastolekin batera Ikastolen Elkarteko kide gara eta Euskal Herriko Ikastolak Europar Kooperatiba osatzen dugu.
Ikuspegia
Larramendi Ikastolaren egitekoaren erdigunea Ikasleak helduarorako eta bizitza osorako ondo prestatzea da, beraien bizitza zentzuz eta arduraz gidatzeko eta ondo bizitzeko gai izan daitezen.
Bizitzaren dimentsio guztietan – pertsonala, soziala, akademikoa eta lan mundukoa eraginkortasunez eta arduraz ekiteko, ondo prestatutako eta oinarri sendoko pertsonak hezi nahi ditugu.
Pertsona osoaren garapenaren oinarriak - gizabanako, gizarte kide eta izadi kide gisa - era orekatuan finkatu nahi ditugu.
Oinarrizko zehar-konpetentziak eta diziplina-barruko konpetentziak, hau da, bizitzarako ezinbestekoak direnak, bikaintasunez eskuratzen dituzten pertsonak nahi ditugu.
Euskal Herrian eta munduan bizitzeko euskal kulturaren eta kultura unibertsalaren oinarriak eskuratu dituzten eta euskara ardatz duten pertsona eleaniztunak hezi nahi ditugu.
Goragoko ikasketak egiteko nahiz lanean hasteko eta bizitzan zehar etengabe ikasteko eta prestatzeko motibazioa duten pertsonak hezi nahi ditugu.
Balioak
Larramendi ikastolaren izaeran oinarrituz eta bere egitekoa betetzeko ondorengo balioak lehenesten ditugu.